ബാരിക്കേഡിന് മുകളിൽ രാഹുൽ ഗാന്ധി, ഡൽഹിയിൽ വീണ്ടും പ്രക്ഷോഭക്കടൽ; രാഹുലും പ്രിയങ്കയും ഉൾപ്പെടെയുള്ള എം.പിമാരെ ബലപ്രയോഗത്തിലൂടെ കസ്റ്റഡിയിലെടുത്ത് പോലീസ്!
ന്യൂഡൽഹി: ചീഫ് ഇലക്ഷൻ കമ്മീഷണർ (സി.ഇ.സി) ജ്ഞാനേഷ് കുമാറിന്റെ രാജിയും വോട്ടർപട്ടിക തിരിമറികളിൽ നടപടിയും ആവശ്യപ്പെട്ട് രാജ്യതലസ്ഥാനത്ത് ‘ഇന്ത്യ’ (INDIA) മുന്നണി നടത്തിയ ‘ജനാധിപത്യ സംരക്ഷണ മാർച്ച്’ (Save Democracy March) അത്യന്തം സംഘർഷഭരിതമായി. തെരഞ്ഞെടുപ്പ് കമ്മീഷൻ ആസ്ഥാനത്തേക്ക് പ്രതിപക്ഷ എം.പിമാർ നടത്തിയ മാർച്ചിൽ പോലീസ് ഉയർത്തിയ വലിയ ബാരിക്കേഡുകൾക്ക് മുകളിലേക്ക് ലോക്‌സഭാ പ്രതിപക്ഷ നേതാവ് രാഹുൽ ഗാന്ധി ചാടിക്കയറുകയും പതാക ഉയർത്തി പ്രതിഷേധിക്കുകയും ചെയ്തതോടെ വിജയ് ചൗക്ക് പരിസരം യുദ്ധക്കളത്തിന് സമാനമായി മാറിയ നാടകീയ രംഗങ്ങൾക്കാണ് സാക്ഷ്യം വഹിച്ചത്.
സംഭവത്തെ തുടർന്ന് രാഹുൽ ഗാന്ധി, പ്രിയങ്ക ഗാന്ധി വദ്ര, കെ.സി. വേണുഗോപാൽ, സമാജ്‌വാദി പാർട്ടി അധ്യക്ഷൻ അഖിലേഷ് യാദവ് തുടങ്ങി പ്രമുഖ പ്രതിപക്ഷ നേതാക്കളെയും എം.പിമാരെയും ഡൽഹി പോലീസ് ബലപ്രയോഗത്തിലൂടെ കസ്റ്റഡിയിലെടുത്തു. പുതിയ പാർലമെന്റ് മന്ദിരത്തിൽ നിന്ന് തെരഞ്ഞെടുപ്പ് കമ്മീഷൻ ആസ്ഥാനത്തേക്ക് ആരംഭിച്ച പ്രകടനത്തെ റഫി മാർഗിന് സമീപം വൻ പോലീസ് സന്നാഹവും ബാരിക്കേഡുകളും നിരത്തി പോലീസ് തടയുകയായിരുന്നു.
ബാരിക്കേഡുകൾ തകർത്ത് മുന്നേറാൻ ശ്രമിച്ച പ്രക്ഷോഭകരും പോലീസും തമ്മിൽ വൻ വാക്കേറ്റവും തള്ളറ്റവും ഉടലെടുത്തു. പോലീസ് സുരക്ഷാ വലയം ഭേദിക്കാനുള്ള ശ്രമങ്ങൾക്കിടെയാണ് രാഹുൽ ഗാന്ധിയും മറ്റ് പ്രധാന നേതാക്കളും അപ്രതീക്ഷിതമായി കൂറ്റൻ ബാരിക്കേഡിന് മുകളിലേക്ക് കയറിയത്. സർക്കാരിന്റെയും തെരഞ്ഞെടുപ്പ് കമ്മീഷന്റെയും ജനാധിപത്യവിരുദ്ധ നടപടികൾക്കെതിരെ രാഹുൽ ഗാന്ധി ബാരിക്കേഡിന് മുകളിൽ നിന്ന് ഉറക്കെ മുദ്രാവാക്യം വിളിക്കുകയും ജനാധിപത്യ സംരക്ഷണം ആവശ്യപ്പെടുകയും ചെയ്തു. ഇത് സമരരംഗത്തുണ്ടായിരുന്ന നൂറുകണക്കിന് പ്രവർത്തകർക്ക് വൻ ആവേശമായി മാറി.
വിഷയത്തിൽ മാധ്യമങ്ങളോട് സംസാരിച്ച രാഹുൽ ഗാന്ധി, ഇത് വെറുമൊരു രാഷ്ട്രീയ പോരാട്ടമല്ലെന്നും രാജ്യത്തിന്റെ ഭരണഘടനയും ‘ഒരാൾക്ക് ഒരു വോട്ട്’ എന്ന ജനാധിപത്യപരമായ അവകാശവും സംരക്ഷിക്കാനുള്ള പോരാട്ടമാണെന്നും തുറന്നടിച്ചു. വോട്ടർപട്ടികയിൽ നിന്ന് വ്യാപകമായി യഥാർത്ഥ വോട്ടർമാരുടെ പേരുകൾ നീക്കം ചെയ്യുകയും വ്യാജ വോട്ടർമാരെ തിരുകിക്കയറ്റുകയും ചെയ്യുന്നത് തെരഞ്ഞെടുപ്പ് കമ്മീഷന്റെ അറിവോടെയാണെന്നും, ഇതിനെതിരെ ചോദ്യങ്ങൾ ചോദിക്കുമ്പോൾ മറുപടി പറയാൻ കമ്മീഷൻ തയ്യാറാകുന്നില്ലെന്നും അദ്ദേഹം കുറ്റപ്പെടുത്തി.
പ്രതിപക്ഷ പ്രക്ഷോഭം രാജ്യതലസ്ഥാനത്തെ ജനജീവിതത്തെയും ഗതാഗതത്തെയും മണിക്കൂറുകളോളം ബാധിച്ചു. പോലീസ് ബസുകളിൽ കയറ്റി കസ്റ്റഡിയിലെടുത്ത നേതാക്കളെ വിവിധ പോലീസ് സ്റ്റേഷനുകളിലേക്ക് മാറ്റി. ചീഫ് ഇലക്ഷൻ കമ്മീഷണറുടെ രാജിയില്ലാതെ തങ്ങൾ പിന്നോട്ടില്ലെന്നും വോട്ടർപട്ടിക സുതാര്യമാക്കും വരെയും സമാനതകളില്ലാത്ത ഈ ജനകീയ പ്രക്ഷോഭം തെരുവുകളിലും പാർലമെന്റിലും തുടരുമെന്നും ‘ഇന്ത്യ’ മുന്നണി നേതാക്കൾ ഒരേസ്വരത്തിൽ പ്രഖ്യാപിച്ചു.
