“ഒരു മിനിറ്റ് ഞാൻ പറയുന്നത് കേൾക്കൂ” വഴങ്ങാതെ ജനരോഷം, കേന്ദ്ര ധനമന്ത്രിയുടെ പരിപാടിക്കിടെ സദസ്സിൽ മുദ്രാവാക്യവിളി
അമരാവതി: ആന്ധ്രാപ്രദേശിലെ മദനാപല്ലെയിൽ നടന്ന ഔദ്യോഗിക പരിപാടിക്കിടെ കേന്ദ്ര ധനമന്ത്രി നിർമല സീതാരാമന്റെ പ്രസംഗം തടസ്സപ്പെട്ട സംഭവത്തെച്ചൊല്ലി കേന്ദ്ര ഭരണമുന്നണിയും കോൺഗ്രസും തമ്മിൽ രൂക്ഷമായ രാഷ്ട്രീയ പോര്. പരിപാടിയിലുണ്ടായ ബഹളം കേന്ദ്ര സർക്കാരിനെതിരെയുള്ള ജനങ്ങളുടെയും യുവാക്കളുടെയും തൊഴില്ലായ്മ രോഷമാണെന്ന കോൺഗ്രസ് ജനറൽ സെക്രട്ടറി ജയറാം രമേശിന്റെ ആരോപണം തള്ളി ധനമന്ത്രി നിർമല സീതാരാമനും ആന്ധ്രാപ്രദേശ് മുഖ്യമന്ത്രി എൽ. ചന്ദ്രബാബു നായിഡുവും രംഗത്തെത്തി. പ്രവർത്തകരുടെ ആവേശത്തെ ജനരോഷമായി ചിത്രീകരിച്ച് തെറ്റായ പ്രചാരണം നടത്തുകയാണെന്ന് ഭരണപക്ഷ നേതാക്കൾ തിരിച്ചടിച്ചു.
ഒക്ടോബർ രണ്ടിന് മദനാപല്ലെയിൽ നടന്ന ‘ഗ്ലോബൽ ഹോർട്ടികൾച്ചർ ഹബ് – റായലസീമ റൈസിംഗ്’ പദ്ധതിയുടെ തറക്കല്ലിടൽ ചടങ്ങിലാണ് സംഭവം നടന്നത്. ധനമന്ത്രി നിർമല സീതാരാമൻ പ്രസംഗിക്കുന്നതിനിടെ സദസ്സിൽ നിന്ന് ഉയർന്ന വൻ മുദ്രാവാക്യവിളികളും ബഹളവും കാരണം പ്രസംഗം തടസ്സപ്പെടുകയായിരുന്നു. “ഒരു മിനിറ്റ് ഞാൻ പറയുന്നത് കേൾക്കൂ” എന്ന് ധനമന്ത്രി പലതവണ അഭ്യർത്ഥിച്ചെങ്കിലും ബഹളം തുടർന്നതോടെ മുഖ്യമന്ത്രി ചന്ദ്രബാബു നായിഡു തന്നെ നേരിട്ട് ഇടപെടുകയും ജനങ്ങളോട് ശാന്തരാകാൻ ആവശ്യപ്പെടുകയുമായിരുന്നു. പരിപാടി കഴിഞ്ഞ ശേഷം തങ്ങളും ഉപമുഖ്യമന്ത്രി പവൻ കല്യാണും പുറത്തുവന്ന് കാണാമെന്നും അതുവരെ സദസ്സിൽ ഇരിക്കണമെന്നും നായിഡു ജനങ്ങളോട് അഭ്യർത്ഥിച്ചു.
ഈ സംഭവത്തിന്റെ വീഡിയോ ദൃശ്യങ്ങൾ പങ്കുവെച്ചുകൊണ്ടാണ് കോൺഗ്രസ് മുതിർന്ന നേതാവ് ജയറാം രമേശ് രംഗത്തെത്തിയത്. രാജ്യത്ത് വർദ്ധിച്ചുവരുന്ന തൊഴില്ലായ്മയിലും തൊഴിലില്ലായ്മയിലുമുള്ള ജനങ്ങളുടെയും യുവാക്കളുടെയും രോഷമാണ് കേന്ദ്ര ധനമന്ത്രിക്കെതിരെ മദനാപല്ലെയിൽ പ്രകടമായതെന്നും, ജനങ്ങളെ നിശ്ശബ്ദരാക്കാൻ മുഖ്യമന്ത്രിക്ക് ഇടപെടേണ്ടി വന്നുവെന്നും ജയറാം രമേശ് എക്സിൽ (X) കുറിച്ചു. സോഷ്യൽ മീഡിയയിൽ ഈ ദൃശ്യങ്ങൾ പ്രചരിച്ചതോടെ വിഷയം ദേശീയതലത്തിൽ വലിയ ചർച്ചയായി മാറി.
എന്നാൽ, ജയറാം രമേശിന്റെ വാദങ്ങളെ പൂർണ്ണമായും തള്ളിക്കളഞ്ഞുകൊണ്ട് നിർമല സീതാരാമൻ തന്നെ നേരിട്ട് മറുപടി നൽകി. അവിവേകത്തോടെയാണ് ജയറാം രമേശ് പ്രതികരിച്ചതെന്നും തെലുഗുദേശം പാർട്ടി (ടി.ഡി.പി), ജനസേന പാർട്ടി എന്നിവയിലെ പ്രവർത്തകർ തങ്ങളുടെ പ്രിയ നേതാക്കളായ ചന്ദ്രബാബു നായിഡുവിനെയും പവൻ കല്യാണിനെയും കാണാനുള്ള ആവേശത്തിൽ മുദ്രാവാക്യം വിളിക്കുക മാത്രമാണ് ചെയ്തതെന്നും അവർ വ്യക്തമാക്കി. ചടങ്ങ് കഴിഞ്ഞ ശേഷം കാണാമെന്നാണ് മുഖ്യമന്ത്രി അവരോട് പറഞ്ഞതെന്നും ഇതിൽ യാതൊരുവിധ പ്രതിഷേധവും ഉണ്ടായിട്ടില്ലെന്നും ധനമന്ത്രി കൂട്ടിച്ചേർത്തു.
ആന്ധ്ര പ്രദേശ് മുഖ്യമന്ത്രി ചന്ദ്രബാബു നായിഡുവും സംസ്ഥാന മന്ത്രി നാര ലോകേഷും വിഷയത്തിൽ കടുത്ത ഭാഷയിൽ പ്രതികരിച്ചു. ജനങ്ങളുടെ ആവേശവും സ്നേഹപ്രകടനവും കാണുമ്പോൾ അത് ജനരോഷമാണെന്ന് തെറ്റിദ്ധരിക്കുന്നത് കോൺഗ്രസിന് ജനങ്ങളുമായുള്ള ബന്ധം നഷ്ടപ്പെട്ടതുകൊണ്ടാണെന്ന് നായിഡു കുറ്റപ്പെടുത്തി. വസ്തുതകൾ പരിശോധിക്കാതെ വ്യാജ വാർത്തകൾ പ്രചരിപ്പിക്കുന്നത് അപലപനീയമാണെന്നും തെറ്റായ പോസ്റ്റ് പിൻവലിക്കണമെന്നും നാര ലോകേഷ് ആവശ്യപ്പെട്ടു. രാഷ്ട്രീയ ലാഭത്തിനുവേണ്ടി ദൃശ്യങ്ങൾ ദുർവ്യാഖ്യാനം ചെയ്യുകയാണെന്ന് ടി.ഡി.പി നേതൃത്വവും ആരോപിച്ചു.
