സംസ്ഥാനത്ത് ഇന്നും രാത്രി പീക്ക് സമയങ്ങളിൽ ഭാഗികമായി വൈദ്യുതി നിയന്ത്രണം
സംസ്ഥാനത്ത് ഇന്നും രാത്രി പീക്ക് സമയങ്ങളിൽ ഭാഗികമായി വൈദ്യുതി നിയന്ത്രണം ഏർപ്പെടുത്തിയേക്കുമെന്ന് കേരള സ്റ്റേറ്റ് ഇലക്ട്രിസിറ്റി ബോർഡ് (കെഎസ്ഇബി) അറിയിച്ചു. കാലവർഷത്തിൽ ഉണ്ടായ കുറവും അന്തരീക്ഷ താപനിലയിലുണ്ടായ വർദ്ധനവും കാരണം മുൻ ദിവസങ്ങളെ അപേക്ഷിച്ച് ഇന്നത്തെ വൈദ്യുതി ഉപഭോഗത്തിൽ ഏകദേശം 400 മുതൽ 500 മെഗാവാട്ട് വരെ വർദ്ധനവുണ്ടാകാനാണ് സാധ്യത. ഉപഭോഗം കുത്തനെ ഉയരുന്ന വൈകുന്നേരം 7 മണി മുതൽ അർദ്ധരാത്രി വരെയുള്ള സമയങ്ങളിലായിരിക്കും നിയന്ത്രണം ഏർപ്പെടുത്താൻ സാധ്യതയുള്ളതെന്ന് അധികൃതർ വ്യക്തമാക്കി.
ദേശീയതലത്തിൽ ഊർജ്ജ ആവശ്യകത വർദ്ധിച്ചതോടെ പവർ എക്സ്ചേഞ്ച് വഴി സംസ്ഥാനത്തിന് ആവശ്യമായ അളവിൽ വൈദ്യുതി ലഭ്യമാകാത്തതാണ് ഇപ്പോഴത്തെ പ്രതിസന്ധിക്ക് കാരണം. ഈ സാഹചര്യത്തിൽ സ്ഥിതിഗതികൾ നിയന്ത്രണവിധേയമാക്കാൻ ഉപഭോക്താക്കൾ സഹകരിക്കണമെന്ന് കെഎസ്ഇബി അഭ്യർത്ഥിച്ചു. പ്രതിസന്ധി ലഘൂകരിക്കുന്നതിനായി രാത്രി സമയങ്ങളിൽ എയർ കണ്ടീഷണറുകൾ, വാട്ടർ ഹീറ്ററുകൾ, ഇലക്ട്രിക് വാഹനങ്ങളുടെ ചാർജിംഗ് തുടങ്ങിയ ഉയർന്ന ശേഷിയുള്ള വൈദ്യുത ഉപകരണങ്ങളുടെ ഉപയോഗം പരമാവധി കുറയ്ക്കണമെന്നും ബോർഡ് നിർദ്ദേശിച്ചിട്ടുണ്ട്.
