പുരി രഥയാത്രയ്ക്കിടെ തിരക്കിൽപ്പെട്ട് ഒരാൾ മരിച്ചു; നൂറിലധികം പേർക്ക് ശ്വാസംമുട്ടലും അസ്വസ്ഥതയും
ഭുവനേശ്വർ: ഒഡീഷയിലെ പുരിയിൽ നടക്കുന്ന വിഖ്യാതമായ ജഗന്നാഥ രഥയാത്രയ്ക്കിടെയുണ്ടായ വൻ ജനത്തിരക്കിൽപ്പെട്ട് ഒരു തീർത്ഥാടകൻ മരണപ്പെട്ടു. ജഗന്നാഥ ക്ഷേത്രത്തിന്റെ പ്രധാന കവാടമായ സിംഹദ്വാരത്തിന് സമീപം അനുഭവപ്പെട്ട അനിയന്ത്രിതമായ തിരക്കിൽപ്പെട്ട് നൂറിലധികം ഭക്തർക്ക് ശ്വാസംമുട്ടലും മറ്റ് ശാരീരിക അസ്വസ്ഥതകളും അനുഭവപ്പെട്ടു. അറുപത് വയസ്സിനു മുകളിൽ പ്രായമുള്ള തീർത്ഥാടകനാണ് ശ്വാസംമുട്ടി കുഴഞ്ഞുവീണ് മരിച്ചത്. ഇദ്ദേഹത്തെ ഉടൻ തന്നെ പുരി ജില്ലാ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. ഇതിനുപുറമെ, ഹൃദയാഘാതത്തെ തുടർന്ന് മറ്റൊരാളും ഉത്സവമേഖലയിൽ മരണപ്പെട്ടതായി അധികൃതർ അറിയിച്ചു.
ലക്ഷക്കണക്കിന് ഭക്തർ ഒത്തുചേർന്ന രഥയാത്രയുടെ പ്രധാന ചടങ്ങായ ‘പഹണ്ടി’ ഘോഷയാത്രയ്ക്കിടെയാണ് അപകടമുണ്ടായത്. സിംഹദ്വാരത്തിന് സമീപം തീർത്ഥാടകരുടെ വൻ തിരക്ക് രൂപപ്പെട്ടതോടെ പലർക്കും അസ്വസ്ഥത അനുഭവപ്പെടുകയും കുഴഞ്ഞുവീഴുകയുമായിരുന്നു. ഒഡീഷ ഫയർ ആൻഡ് റെസ്ക്യൂ സർവീസിന്റെ പ്രത്യേക രക്ഷാസേനയും (SRU) സുരക്ഷാ ഉദ്യോഗസ്ഥരും ഉടനടി ഇടപെട്ട് സ്ട്രെച്ചറുകളിലാണ് അസ്വസ്ഥത അനുഭവപ്പെട്ട ഭക്തരെ തിരക്കിൽ നിന്ന് മാറ്റിയത്. ഇവർക്ക് പ്രഥമശുശ്രൂഷയും ഓക്സിജൻ പിന്തുണയും നൽകിയ ശേഷം സമീപത്തെ താൽക്കാലിക ആശുപത്രികളിലേക്ക് മാറ്റി. കഴിഞ്ഞ വർഷം ഗുണ്ടിച്ച ക്ഷേത്രത്തിന് സമീപമുണ്ടായ തിക്കിലും തിരക്കിലും പെട്ട് മൂന്ന് പേർ മരിച്ച സംഭവത്തിന്റെ പശ്ചാത്തലത്തിൽ, ഇത്തവണ കൂടുതൽ ജാഗ്രത പാലിക്കണമെന്നും സുരക്ഷാ ക്രമീകരണങ്ങൾ ശക്തമാക്കണമെന്നും പ്രതിപക്ഷ നേതാവ് നവീൻ പട്നായിക് സർക്കാരിനോട് ആവശ്യപ്പെട്ടു.
