മുട്ടയെച്ചൊല്ലി തർക്കം: തള്ളിവീഴ്ത്തിയതിനെത്തുടർന്ന് ചികിത്സയിലായിരുന്നയാൾ മരിച്ചു; പ്രതി അറസ്റ്റിൽ
മലപ്പുറം മൂന്നിയൂരിൽ കോഴിമുട്ട വാങ്ങുന്നതിനെച്ചൊല്ലിയുണ്ടായ തർക്കത്തെത്തുടർന്ന് റോഡിൽ തലയടിച്ചു വീണ കുന്നത്ത് പറമ്പ് സ്വദേശി ഫൈസൽ മരണപ്പെട്ടു. സംഭവവുമായി ബന്ധപ്പെട്ട് പ്രതിയായ ലത്തീഫിനെ പോലീസ് അറസ്റ്റ് ചെയ്തു. കഴിഞ്ഞ ജൂലൈ എട്ടാം തീയതി മൂന്നിയൂർ കുന്നത്തുപറമ്പിലെ ഒരു കടയിലാണ് കേസിനാസ്പദമായ ദാരുണ സംഭവം അരങ്ങേറിയത്.
കടയിലെത്തിയ ഫൈസലും ലത്തീഫും അഞ്ച് മുട്ടകൾ വീതം ആവശ്യപ്പെട്ടെങ്കിലും ആകെ ആറ് മുട്ടകൾ മാത്രമാണ് കടയിൽ ഉണ്ടായിരുന്നത്. ഈ മുട്ടകൾ ഇരുവരും വീതിച്ചെടുക്കാൻ കടക്കാരൻ നിർദ്ദേശിച്ചെങ്കിലും ഫൈസൽ അതിന് വഴങ്ങിയില്ല. തുടർന്ന് തനിക്ക് ലഭിച്ച മുട്ടകളുമായി ലത്തീഫ് മടങ്ങാൻ ഒരുങ്ങവെ ഇരുവരും തമ്മിൽ വാക്കേറ്റമുണ്ടാകുകയും, പ്രകോപിതനായ ഫൈസൽ തൻ്റെ കയ്യിലുണ്ടായിരുന്ന മുട്ട ലത്തീഫിൻ്റെ ദേഹത്തേക്ക് എറിയുകയുമായിരുന്നു.
ഇതിൽ ക്ഷുഭിതനായ ലത്തീഫ് ഫൈസലിനെ ബലമായി പിടിച്ചു തള്ളിയപ്പോൾ നിയന്ത്രണം നഷ്ടപ്പെട്ട് റോഡിലേക്ക് മറിഞ്ഞുവീണ ഫൈസലിന്റെ തലയ്ക്ക് ഗുരുതരമായി പരിക്കേറ്റു. അപകടം നടന്ന ഉടനെ ആശുപത്രിയിൽ എത്തിച്ചെങ്കിലും പ്രാഥമിക ചികിത്സയ്ക്ക് ശേഷം ഫൈസൽ വീട്ടിലേക്ക് മടങ്ങിയിരുന്നു. എന്നാൽ തൊട്ടടുത്ത ദിവസം കടുത്ത ശാരീരിക ബുദ്ധിമുട്ടുകൾ അനുഭവപ്പെട്ടതിനെ തുടർന്ന് കോട്ടക്കലിലെ സ്വകാര്യ ആശുപത്രിയിൽ പ്രവേശിപ്പിക്കപ്പെട്ട ഫൈസൽ, ചികിത്സയിലിരിക്കെയാണ് മരണത്തിന് കീഴടങ്ങിയത്. വീഴ്ചയിൽ തലയ്ക്കേറ്റ ഗുരുതരമായ പരിക്കാണ് മരണകാരണമെന്ന് പോലീസ് വ്യക്തമാക്കി.
