മധ്യപ്രദേശ് ഭോജ്ശാല കേസ്: മുസ്ലിം വിഭാഗത്തിന് താൽക്കാലിക നമസ്കാര സ്ഥലം കണ്ടെത്താൻ സുപ്രീം കോടതി നിർദ്ദേശം
ന്യൂഡൽഹി: മധ്യപ്രദേശിലെ ധാർ ജില്ലയിലുള്ള ചരിത്രപ്രസിദ്ധമായ ഭോജ്ശാല സരസ്വതി ക്ഷേത്രം-കമാൽ മൗല മസ്ജിദ് സമുച്ചയ തർക്കത്തിൽ സുപ്രീം കോടതിയുടെ സുപ്രധാന ഇടപെടൽ. കേസിൽ അന്തിമ തീരുമാനം ഉണ്ടാകുന്നത് വരെ മുസ്ലിം വിഭാഗത്തിന് വെള്ളിയാഴ്ചകളിൽ ജുമുഅ നമസ്കാരം നിർവഹിക്കുന്നതിനായി തർക്കഭൂമിക്ക് സമീപമുള്ള തുറന്ന സ്ഥലം താൽക്കാലികമായി കണ്ടെത്തി നൽകാൻ സുപ്രീം കോടതി നിർദ്ദേശിച്ചു. ചീഫ് ജസ്റ്റിസ് സൂര്യകാന്ത് അധ്യക്ഷനായ മൂന്നംഗ ബെഞ്ചാണ് ഈ നിർദ്ദേശം മുന്നോട്ടുവെച്ചത്.
വെള്ളിയാഴ്ചകളിൽ ഉച്ചയ്ക്ക് 1 മണിക്കും 3 മണിക്കും ഇടയിൽ നമസ്കാരം നിർവഹിക്കുന്നതിനായി തർക്ക സമുച്ചയത്തോട് ചേർന്നുള്ള അനുയോജ്യമായ സ്ഥലം താൽക്കാലികമായി നിശ്ചയിച്ചു നൽകാനാണ് കോടതി നിർദ്ദേശിച്ചിട്ടുള്ളത്. ഇതോടൊപ്പം, സുപ്രീം കോടതിയുടെ മുൻകൂർ അനുമതിയില്ലാതെ തർക്ക പ്രദേശത്ത് യാതൊരുവിധ നിർമ്മാണ പ്രവർത്തനങ്ങളോ ഘടനാപരമായ മാറ്റങ്ങളോ വരുത്തരുതെന്ന് പുരാവസ്തു വകുപ്പിന് (ASI) കോടതി കർശന നിർദ്ദേശം നൽകി.
വിവാദമായ ഭോജ്ശാല സമുച്ചയം വാഗ്ദേവിയായ സരസ്വതി ദേവിയുടെ ക്ഷേത്രമാണെന്ന് പ്രഖ്യാപിച്ച മധ്യപ്രദേശ് ഹൈക്കോടതി വിധിക്കെതിരെ മുസ്ലിം സംഘടനകൾ സമർപ്പിച്ച ഹർജിയിലാണ് സുപ്രീം കോടതിയുടെ നടപടി. നിലവിലെ സ്ഥിതി തുടരണമെന്ന ഇടക്കാല ഉത്തരവ് പുറപ്പെടുവിക്കാൻ കോടതി വിസമ്മതിച്ചു. എന്നാൽ കേസിൽ അടിയന്തരമായി വാദം കേൾക്കാമെന്ന് സുപ്രീം കോടതി സമ്മതിച്ചിട്ടുണ്ട്.
ഹിന്ദുവിഭാഗം സരസ്വതി ദേവിയുടെ പ്രാർത്ഥനാ സ്ഥലമായും മുസ്ലിം വിഭാഗം പതിനൊന്നാം നൂറ്റാണ്ടിലെ കമാൽ മൗല മസ്ജിദ് ആയും കാണുന്ന ഈ ചരിത്ര സ്മാരകം നിലവിൽ ആർക്കിയോളജിക്കൽ സർവേ ഓഫ് ഇന്ത്യയുടെ (ASI) സംരക്ഷണത്തിലാണ്. ദീർഘകാലമായി തുടരുന്ന ഈ തർക്കത്തിൽ നിയമപരമായ പരിഹാരം ഉണ്ടാകുന്നത് വരെ ഇരുവിഭാഗങ്ങളുടെയും ആരാധനാ സ്വാതന്ത്ര്യം സമാധാനപരമായി ഉറപ്പാക്കാനാണ് കോടതി ഇപ്പോൾ ശ്രമിക്കുന്നത്.
