സംസ്ഥാനത്ത് വൈദ്യുതി പ്രതിസന്ധി രൂക്ഷം; വൈകുന്നേരങ്ങളിൽ ഭാഗിക നിയന്ത്രണം ഏർപ്പെടുത്താൻ കെഎസ്ഇബി
തിരുവനന്തപുരം: ചൂട് ക്രമാതീതമായി ഉയർന്നതും എൽ നിനോ പ്രതിഭാസത്തെ തുടർന്നുള്ള കടുത്ത മഴക്കുറവും മൂലം സംസ്ഥാനത്ത് വൈദ്യുതി പ്രതിസന്ധി രൂക്ഷമാകുന്നു. ഇതിനെത്തുടർന്ന് ഇന്ന് വൈകുന്നേരം 7:00 മണി മുതൽ കേരളത്തിൽ ഭാഗികമായി വൈദ്യുതി നിയന്ത്രണം ഏർപ്പെടുത്താൻ കെ.എസ്.ഇ.ബി (KSEB) തീരുമാനിച്ചു. മുൻവർഷങ്ങളെ അപേക്ഷിച്ച് വൈദ്യുതി ഉപഭോഗത്തിൽ വൻ വർദ്ധനവാണ് നിലവിൽ രേഖപ്പെടുത്തുന്നത്. മുൻ ദിവസങ്ങളിലെ ശരാശരിയേക്കാൾ ഏകദേശം 500 മെഗാവാട്ട് അധികം വൈദ്യുതിയുടെ ആവശ്യകതയാണ് ഇന്ന് സംസ്ഥാനത്ത് കണക്കാക്കിയിരിക്കുന്നത്.
ദേശീയതലത്തിൽ തന്നെ വൈദ്യുതിയുടെ ആവശ്യം കുത്തനെ ഉയർന്നത് കേരളത്തെ കൂടുതൽ പ്രതിസന്ധിയിലാക്കിയിട്ടുണ്ട്. ദേശീയ പവർ എക്സ്ചേഞ്ചുകളിൽ ആവശ്യത്തിന് വൈദ്യുതി ലഭ്യമാകാത്തതിനാൽ പുറത്തുനിന്ന് പണം നൽകി കൂടുതൽ വൈദ്യുതി എത്തിക്കുക എന്നതും കെ.എസ്.ഇ.ബിക്ക് വലിയ വെല്ലുവിളിയായി മാറുകയാണ്. പവർ എക്സ്ചേഞ്ചുകളിൽ നിന്നുള്ള വൈദ്യുതി ലഭ്യതയ്ക്ക് അനുസരിച്ചായിരിക്കും വരും ദിവസങ്ങളിലെ നിയന്ത്രണങ്ങൾ. നിലവിലെ അടിയന്തര സാഹചര്യം മറികടക്കാൻ ഉപഭോക്താക്കൾ വൈകുന്നേരങ്ങളിലെ ഉയർന്ന ഉപഭോഗ സമയത്ത് പരമാവധി വൈദ്യുതി ലാഭിക്കണമെന്നും അധികൃതർ അഭ്യർത്ഥിക്കുന്നു.
