ഇന്ത്യൻ യാത്രക്കാർക്ക് വലിയ ആശ്വാസം; യുഎഇയിലേക്കും മറ്റ് രാജ്യങ്ങളിലേക്കുമുള്ള എമിറേറ്റ്സ് വിമാന ടിക്കറ്റുകൾ ഇനി തവന വ്യവസ്ഥയിൽ (EMI) സ്വന്തമാക്കാം
ദുബായ് ആസ്ഥാനമായി പ്രവർത്തിക്കുന്ന പ്രമുഖ വിമാനക്കമ്പനിയായ എമിറേറ്റ്സ് ഇന്ത്യൻ യാത്രക്കാർക്കായി പുതിയ യാത്രാ ആനുകൂല്യങ്ങൾ പ്രഖ്യാപിച്ചു. ഇന്ത്യയിൽ നിന്നും യുഎഇയിലേക്കും എമിറേറ്റ്സിന്റെ ശൃംഖലയിലുള്ള മറ്റ് അന്താരാഷ്ട്ര രാജ്യങ്ങളിലേക്കും യാത്ര ചെയ്യുന്നവർക്കായി പ്രതിമാസ തവണ വ്യവസ്ഥയിൽ (EMI) ടിക്കറ്റുകൾ ലഭ്യമാക്കുന്ന പദ്ധതിയാണ് കമ്പനി അവതരിപ്പിച്ചിരിക്കുന്നത്. ഈ പുതിയ സൗകര്യം വഴി ടിക്കറ്റ് തുക മുഴുവനായും ഒന്നിച്ച് നൽകുന്നതിന് പകരം മൂന്ന് മാസം മുതൽ 36 മാസം വരെയുള്ള കാലയളവിലേക്ക് തവണകളായി വിഭജിച്ച് അടയ്ക്കാൻ യാത്രക്കാർക്ക് സാധിക്കും.
എമിറേറ്റ്സിന്റെ വെബ്സൈറ്റ് വഴി നേരിട്ട് ടിക്കറ്റ് ബുക്ക് ചെയ്യുന്നവർക്കാണ് ഈ ആകർഷകമായ സൗകര്യം ലഭ്യമാകുക. ഇന്ത്യയിലെ പ്രമുഖരായ 12 പൊതുമേഖലാ-സ്വകാര്യ ബാങ്കുകളുടെ ക്രെഡിറ്റ് കാർഡുകൾ ഉപയോഗിച്ച് യാത്രക്കാർക്ക് ഈ ഇഎംഐ ഓഫർ പ്രയോജനപ്പെടുത്താം. സ്റ്റേറ്റ് ബാങ്ക് ഓഫ് ഇന്ത്യ (SBI), എച്ച്ഡിഎഫ്സി (HDFC), ഐസിഐസിഐ (ICICI), ആക്സിസ് ബാങ്ക് (Axis Bank), കൊട്ടക് മഹീന്ദ്ര, എച്ച്എസ്ബിസി (HSBC) തുടങ്ങി ഇന്ത്യയിലെ പ്രമുഖ ബാങ്കുകൾ ഈ പദ്ധതിയുടെ ഭാഗമാണ്. എമിറേറ്റ്സിന്റെ ആഗോള ശൃംഖലയിലെ 140 ഓളം ലക്ഷ്യസ്ഥാനങ്ങളിലേക്കുള്ള യാത്രകൾക്ക് ഈ പ്ലാൻ ബാധകമായിരിക്കും.
ഇന്ത്യ എമിറേറ്റ്സിന്റെ ഏറ്റവും പ്രധാനപ്പെട്ടതും സജീവവുമായ വിപണികളിലൊന്നാണ്. യുഎഇയിലേക്കും കൂടാതെ ദുബായ് വഴി യൂറോപ്പ്, വടക്കേ അമേരിക്ക, ആഫ്രിക്ക തുടങ്ങിയ രാജ്യങ്ങളിലേക്കും പോകുന്ന ഇന്ത്യൻ യാത്രക്കാരുടെ എണ്ണത്തിൽ വലിയ വർദ്ധനവാണ് രേഖപ്പെടുത്തുന്നത്. ഈ സാഹചര്യത്തിൽ മിതമായ നിരക്കിൽ കൂടുതൽ ആളുകൾക്ക് യാത്രകൾ സാധ്യമാക്കുക എന്ന ലക്ഷ്യത്തോടെയാണ് ഈ ഫ്ലെക്സിബിൾ പേയ്മെന്റ് പ്ലാൻ ഒരുക്കിയിരിക്കുന്നതെന്ന് ഇന്ത്യ-നേപ്പാൾ മേഖലയിലെ എമിറേറ്റ്സ് വൈസ് പ്രസിഡന്റ് മുഹമ്മദ് സർഹാൻ വ്യക്തമാക്കി. എന്നാൽ, ഇഎംഐ തിരഞ്ഞെടുക്കുന്നവർക്ക് അതത് ബാങ്കുകളുടെ പലിശ നിരക്കുകളും പ്രോസസിംഗ് ഫീസും ഉൾപ്പെടെയുള്ള നിബന്ധനകൾ ബാധകമായിരിക്കുമെന്നും എമിറേറ്റ്സ് അധികൃതർ അറിയിച്ചിട്ടുണ്ട്.
