മാതാപിതാക്കളെ നോക്കാത്ത മക്കളെ വീട്ടിൽ നിന്ന് ഇറക്കിവിടാം: ട്രിബ്യൂണലുകൾക്ക് പൂർണ്ണ അധികാരമെന്ന് സുപ്രീം കോടതി
ന്യൂഡൽഹി: മാതാപിതാക്കളുടെയും മുതിർന്ന പൗരന്മാരുടെയും അന്തസ്സോടെയുള്ള ജീവിതവും സംരക്ഷണവും ഉറപ്പാക്കുന്നതിൽ ചരിത്രപരമായ നിർണ്ണായക വിധിയുമായി സുപ്രീം കോടതി. മാതാപിതാക്കളെ സംരക്ഷിക്കാത്തതും ഉപദ്രവിക്കുന്നതുമായ മക്കളെയോ മറ്റ് ബന്ധുക്കളെയോ അവരുടെ സ്വത്തിൽ നിന്നും വീട്ടിൽ നിന്നും കുടിയൊഴിപ്പിക്കാൻ (Eviction) ‘മുതിർന്ന പൗരന്മാരുടെ സംരക്ഷണ നിയമ പ്രകാരമുള്ള ട്രിബ്യൂണലുകൾക്ക്’ (Maintenance Tribunals) പൂർണ്ണ അധികാരമുണ്ടെന്ന് സുപ്രീം കോടതി വ്യക്തമാക്കി. ജസ്റ്റിസ് പി.എസ്. നരസിംഹ, ജസ്റ്റിസ് അലോക് അരാധേ എന്നിവരടങ്ങിയ ബെഞ്ചാണ് ഈ നിർണ്ണായകമായ ഉത്തരം പുറപ്പെടുവിച്ചത്.
2007-ലെ ‘മാതാപിതാക്കളുടെയും മുതിർന്ന പൗരന്മാരുടെയും സംരക്ഷണവും ക്ഷേമവും ഉറപ്പാക്കൽ നിയമം’ (Maintenance and Welfare of Parents and Senior Citizens Act, 2007) ഒരു സാമൂഹിക ക്ഷേമ നിയമമാണെന്ന് കോടതി ചൂണ്ടിക്കാട്ടി. പ്രായമേറുമ്പോൾ മുതിർന്ന പൗരന്മാർ ഒറ്റപ്പെടലിലേക്കോ സുരക്ഷിതത്വമില്ലായ്മയിലേക്കോ തള്ളപ്പെടരുത് എന്ന ലക്ഷ്യത്തോടെയാണ് ഈ നിയമം നിർമ്മിച്ചിരിക്കുന്നത്. അതിനാൽ, ട്രിബ്യൂണലുകൾക്ക് നൽകിയിട്ടുള്ള അധികാര പരിധിയുടെ ഭാഗമായി, മാതാപിതാക്കളുടെ സംരക്ഷണം ഉറപ്പാക്കാൻ ആവശ്യമായ നടപടികൾ കൈക്കൊള്ളാൻ അവർക്ക് അധികാരമുണ്ട്. ഇതിൽ മക്കളെ വീട്ടിൽ നിന്ന് ഒഴിപ്പിക്കുന്നതും ഉൾപ്പെടുന്നുവെന്ന് ബെഞ്ച് നിരീക്ഷിച്ചു.
ഭരണഘടനയുടെ ആർട്ടിക്കിൾ 21 പ്രകാരമുള്ള അന്തസ്സോടെ ജീവിക്കാനുള്ള അവകാശം മനുഷ്യന്റെ പ്രാഥമിക അവകാശമാണെന്നും കോടതി ഓർമ്മിപ്പിച്ചു. ലഖ്നൗവിൽ നിന്നുള്ള കേസുമായി ബന്ധപ്പെട്ട അപ്പീലിലാണ് പരമോന്നത കോടതിയുടെ ഉത്തരവ് ഉണ്ടായിരിക്കുന്നത്. മുതിർന്ന പൗരനായ വ്യക്തിയുടെ സ്വന്തം വീടായിരുന്നിട്ടും അവിടുത്തെ മകൻ അദ്ദേഹത്തിന്റെ പ്രായമായ അമ്മയ്ക്ക് താമസ സൗകര്യം നൽകാതെ വയോജന കേന്ദ്രത്തിലേക്ക് മാറ്റാൻ നിർബന്ധിതയാക്കുകയും പ്രശ്നങ്ങൾ സൃഷ്ടിക്കുകയും ചെയ്യുകയായിരുന്നു. തുടർന്ന് സബ് ഡിവിഷണൽ മജിസ്ട്രേറ്റ് മകനെ വീട്ടിൽ നിന്ന് കുടിയൊഴിപ്പിക്കാൻ ഉത്തരവിട്ടു. എന്നാൽ ഈ ഉത്തരവ് റദ്ദാക്കിയ അലഹബാദ് ഹൈക്കോടതി വിധി തള്ളിക്കളഞ്ഞുകൊണ്ടാണ് സുപ്രീം കോടതി ട്രിബ്യൂണലിന്റെ ഉത്തരവ് പുനഃസ്ഥാപിച്ചത്.
മുതിർന്ന പൗരന്മാരുടെ വീടുകളിൽ കയ്യേറി താമസിക്കുകയും, അവരെ സംരക്ഷിക്കാതിരിക്കുകയും ചെയ്യുന്ന സംഭവങ്ങൾ വ്യാപകമാകുന്ന പശ്ചാത്തലത്തിൽ ഈ വിധി ഏറെ പ്രാധാന്യമർഹിക്കുന്നു. സിവിൽ കോടതികളെ സമീപിക്കാതെ തന്നെ വേഗത്തിൽ നീതി ഉറപ്പാക്കാൻ ട്രിബ്യൂണലുകൾ വഴി സാധിക്കുമെന്ന് സുപ്രീം കോടതി ഉറപ്പിച്ചുപറയുന്നു. വാർദ്ധക്യത്തിൽ മാതാപിതാക്കളെ ശാരീരികമായോ മാനസികമായോ പീഡിപ്പിക്കുന്ന മക്കൾക്ക് വലിയൊരു മുന്നറിയിപ്പാണ് രാജ്യത്തെ പരമോന്നത കോടതിയുടെ ഈ തീരുമാനം.
