സൂര്യൻ ഇന്ന് കഅബയ്ക്ക് നേരെ മുകളിൽ; ദിശ കൃത്യമായി നിർണ്ണയിക്കാൻ അപൂർവ അവസരം
റിയാദ്: മക്കയിലെ വിശുദ്ധ കഅബക്ക് നേരെ മുകളിലായി സൂര്യൻ നേരിട്ടെത്തുന്ന അപൂർവ്വ പ്രതിഭാസം ബുധനാഴ്ച നടക്കും. വർഷത്തിൽ രണ്ടുതവണ മാത്രം സംഭവിക്കുന്ന ഈ ഖഗോള പ്രതിഭാസം, ലോകമെമ്പാടുമുള്ള വിശ്വാസികൾക്ക് തങ്ങളുടെ പ്രദേശങ്ങളിൽ നിന്നും ഖിബ്ലയുടെ (പ്രാർത്ഥനാ ദിശ) കൃത്യമായ ദിശ തിട്ടപ്പെടുത്തുന്നതിനുള്ള ഏറ്റവും ലളിതവും കൃത്യവുമായ പ്രകൃതിദത്ത മാർഗ്ഗമാണ്.
മക്ക സമയം ഉച്ചയ്ക്ക് 12.26-ഓടെയാണ് (ഇന്ത്യൻ സമയം ഉച്ചയ്ക്ക് ഏകദേശം 2.56-ന്) സൂര്യൻ കഅബയുടെ മുകളിലെത്തുക. ഈ സമയത്ത് സൂര്യന്റെ സ്ഥാനം ചക്രവാളത്തിൽ നിന്നും കൃത്യം 90 ഡിഗ്രി ഉയരത്തിലായിരിക്കുമെന്നും അതോടെ കഅബയുടെ നിഴൽ പൂർണ്ണമായും അപ്രത്യക്ഷമാകുമെന്നും ജിദ്ദ അസ്ട്രോണമിക്കൽ സൊസൈറ്റി പ്രസിഡന്റ് മാജിദ് അബു സഹ്ര വ്യക്തമാക്കി. ഭൂമിയിലെ നിശ്ചിത പ്രദേശങ്ങളിൽ നിന്ന് നോക്കുമ്പോൾ സൂര്യന്റെ സ്ഥാനം കഅബയുടെ അക്ഷാംശത്തിന് നേർരേഖയിലായി വരുന്നതാണ് ഈ പ്രതിഭാസത്തിന് കാരണം.
ഈ സമയത്ത് ലോകത്തിന്റെ വിവിധ ഭാഗങ്ങളിൽ സൂര്യനെ ദൃശ്യമാകുന്ന ഇടങ്ങളിലുള്ളവർക്ക് ഖിബ്ല ദിശ വളരെ എളുപ്പത്തിൽ മനസ്സിലാക്കാം. നിരപ്പായ ഒരു പ്രതലത്തിൽ ലംബമായി ഒരു വടി അല്ലെങ്കിൽ ഏതെങ്കിലും നേരായ വസ്തു ഉറപ്പിച്ചു നിർത്തിയാൽ, അതിന്റെ നിഴലിന്റെ നേർവിപരീത ദിശ ഖിബ്ലയുടെ കൃത്യമായ ദിശ കാണിച്ചുതരും. മക്കയിൽ നിന്നും അകലെ സ്ഥിതി ചെയ്യുന്ന രാജ്യങ്ങളിലെ താമസക്കാർക്ക് തങ്ങളുടെ ദിശ ശരിയാണോ എന്ന് പരിശോധിക്കാൻ ഈ പ്രതിഭാസം ഏറെ സഹായകരമാകും.
