അക്ഷരപ്പിശകിൽ ട്രോളി സോഷ്യൽ മീഡിയ, മറുപടിയുമായി കുഞ്ഞാലിക്കുട്ടി
കൊച്ചി: എറണാകുളത്ത് നടന്ന ഒരു പരിപാടിക്കിടെ ആശംസകൾ എഴുതിയപ്പോൾ സംഭവിച്ച അക്ഷരപ്പിശകിനെച്ചൊല്ലിയുള്ള സോഷ്യൽ മീഡിയ ട്രോളുകളോട് പ്രതികരിച്ച് മന്ത്രി. തനിക്കെതിരെ വന്ന ട്രോളുകളെല്ലാം ശ്രദ്ധയിൽപ്പെട്ടിട്ടുണ്ടെന്നും ജനങ്ങളുടെ ഇത്തരം തിരുത്തലുകളെ പൂർണ്ണാർത്ഥത്തിൽ ഉൾക്കൊള്ളുന്നുവെന്നും മന്ത്രി വ്യക്തമാക്കി. ഫേസ്ബുക്ക് കുറിപ്പിലൂടെയായിരുന്നു പ്രതികരണം.
എഴുതുന്നതിനിടയിൽ ചുറ്റും ആളുകൾ സംസാരിക്കുന്നത് കേട്ടപ്പോഴുണ്ടായ ഒരു ചെറിയ ആശയക്കുഴപ്പത്തിലാണ് തെറ്റ് സംഭവിച്ചതെന്ന് മന്ത്രി വിശദീകരിച്ചു.
”ജനങ്ങളുടെ വിമർശനങ്ങളെയും അഭിപ്രായങ്ങളെയും തികഞ്ഞ ജനാധിപത്യ ബോധത്തോടെ കേൾക്കുകയും, തെറ്റുകൾ ഉണ്ടെങ്കിൽ അത് മനസ്സിലാക്കി തിരുത്തി മുന്നോട്ട് പോകുകയും ചെയ്യും. ജനങ്ങൾക്ക് എപ്പോഴും വിമർശിക്കാനും തെറ്റുകൾ ചൂണ്ടിക്കാണിക്കാനുമുള്ള പൂർണ്ണ അധികാരമുണ്ട്. അവരുടെ അഭിപ്രായങ്ങൾ കേൾക്കുകയും അത് ഉൾക്കൊണ്ട് മുന്നോട്ട് പോവുകയും ചെയ്യുക എന്നതാണ് യു.ഡി.എഫിന്റെയും ഈ സർക്കാരിന്റെയും എന്റെയും നയം,” മന്ത്രി കുറിപ്പിൽ വ്യക്തമാക്കി.
വരും ദിവസങ്ങളിൽ ഇത്തരം കാര്യങ്ങളിൽ കൂടുതൽ ശ്രദ്ധ പുലർത്തുമെന്നും, സ്നേഹത്തോടെ തെറ്റുകൾ ചൂണ്ടിക്കാണിച്ച എല്ലാ പ്രിയപ്പെട്ടവർക്കും ഹൃദയം നിറഞ്ഞ നന്ദി അറിയിക്കുന്നുവെന്നും പറഞ്ഞാണ് മന്ത്രി തന്റെ കുറിപ്പ് അവസാനിപ്പിച്ചത്. വരികൾക്കിടയിലെ തെറ്റുകൾ തപ്പിയെടുക്കുന്ന സോഷ്യൽ മീഡിയ ട്രോളന്മാർക്ക് കൃത്യമായ മറുപടിയും ഒപ്പം ജനാധിപത്യപരമായ നിലപാടും വ്യക്തമാക്കുന്ന മന്ത്രിയുടെ പ്രതികരണം ഇതിനോടകം തന്നെ ചർച്ചയായിക്കഴിഞ്ഞു.
