എട്ട് കോടിയുടെ കെ.എം.സി.സി ഓഫീസ് കവർച്ചയിൽ വൻ വഴിതിരിവ്! ബി.ജെ.പി നേതാവ് കസ്റ്റഡിയിൽ; ഞെട്ടിക്കുന്ന വെളിപ്പെടുത്തലുകൾ പുറത്ത്!
കോഴിക്കോട്: ഖത്തറിലെ കെഎംസിസി (കേരള മുസ്‌ലിം കൾച്ചറൽ സെന്റർ) ഓഫിസിൽനിന്ന് ഏകദേശം എട്ട് കോടി രൂപയോളം വരുന്ന 31 ലക്ഷം ഖത്തർ റിയാൽ കവർന്നതുമായി ബന്ധപ്പെട്ട കേസിൽ നിർണായക വഴിതിരിവ്. കേസിൽ പ്രതിയായ കൊയിലാണ്ടി സ്വദേശിയും ബിജെപി പ്രാദേശിക നേതാവുമായ ബാലകൃഷ്ണൻ പൊലീസിൽ കീഴടങ്ങി. ഇക്കഴിഞ്ഞ തദ്ദേശ തിരഞ്ഞെടുപ്പിൽ കൊയിലാണ്ടി നഗരസഭ മൂന്നാം വാർഡിൽ ബിജെപി സ്ഥാനാർഥിയായി മത്സരിച്ചയാളും, പാർട്ടിയുടെ വിയ്യൂർ ബൂത്ത് പ്രസിഡന്റുമാണ് കീഴടങ്ങിയ ബാലകൃഷ്ണൻ (60).
കഴിഞ്ഞ വർഷമാണ് ഇൻഡസ്ട്രിയൽ തൊഴിലാളിയായ ബാലകൃഷ്ണൻ തൊഴിൽ തേടി ഖത്തറിലേക്ക് പോയത്. 2025 സെപ്റ്റംബർ 18-നാണ് ഖത്തറിലെ അൽ തുമാമയിലുള്ള കെഎംസിസി ഓഫിസിന്റെ സ്ട്രോങ് റൂം ഗ്യാസ് കട്ടർ ഉപയോഗിച്ച് തകർത്ത് വൻതുക കവർച്ച ചെയ്യപ്പെട്ടത്. ഈ സംഭവത്തിൽ കണ്ണൂർ സ്വദേശി നൽകിയ പരാതിയുടെ അടിസ്ഥാനത്തിലാണ് കേസ് രജിസ്റ്റർ ചെയ്തിരുന്നത്. പ്രതികളിൽ ചിലർ കൊയിലാണ്ടി സ്വദേശികളായതുകൊണ്ടാണ് പരാതി ഇവിടെയുള്ള പൊലീസിന് ലഭിച്ചതും അന്വേഷണം പുരോഗമിക്കുന്നതും.
താൻ കുറ്റകൃത്യത്തിൽ കരുവാക്കപ്പെടുകയായിരുന്നു എന്നാണ് ബാലകൃഷ്ണൻ പൊലീസിന് നൽകിയിരിക്കുന്ന മൊഴി. ഗൾഫിൽ ജോലി വാഗ്ദാനം ചെയ്ത് കൊണ്ടുപോയ മറ്റ് പ്രതികൾ തന്നെ ഭീഷണിപ്പെടുത്തിയും തെറ്റിദ്ധരിപ്പിച്ചുമാണ് സ്ട്രോങ് റൂമിന്റെ പൂട്ട് ഗ്യാസ് കട്ടർ ഉപയോഗിച്ച് തുറപ്പിച്ചത്. കെഎംസിസിയുടെ ചില ഭാരവാഹികളാണ് തനിക്ക് വീസയും യാത്രാസൗകര്യങ്ങളും ശരിയാക്കി നൽകിയത്. ഖത്തറിലെത്തിയ ശേഷം ഒരു ദിവസം പുലർച്ചെ ജോലിയുണ്ടെന്നു പറഞ്ഞ് ഒരു സ്ഥലത്തേക്ക് കൂട്ടിക്കൊണ്ടുപോവുകയും, അവിടെ എത്തിയപ്പോഴാണ് അതൊരു സംഘടനയുടെ ഓഫിസാണെന്ന് മനസ്സിലായതെന്നും അദ്ദേഹം പറയുന്നു.
തുടർന്ന് ലോക്കർ തുറക്കാൻ ആവശ്യപ്പെടുകയും, ഇതിനായി പത്തു ലക്ഷം രൂപ വാഗ്ദാനം ചെയ്യുകയും ചെയ്തിരുന്നുവെന്നും എന്നാൽ പണം കവർന്ന ശേഷം പ്രതികൾ തനിക്ക് അൽപസംഖ്യ മാത്രമാണ് നൽകിയതെന്നും ബാലകൃഷ്ണൻ വെളിപ്പെടുത്തി. ബോംബെ ഷാജി, റാഷിദ്, സാലിഹ് തുടങ്ങിയവരാണ് ഈ കവർച്ചയിൽ തനിക്കൊപ്പമുണ്ടായിരുന്ന മറ്റുള്ളവരെന്നും അദ്ദേഹം വ്യക്തമാക്കിയിട്ടുണ്ട്. കവർച്ചയ്ക്ക് ശേഷം നാട്ടിലെത്തിയ തനിക്ക് 50,000 രൂപയും പിന്നീട് 1.50 ലക്ഷം രൂപയും നൽകിയെന്നും അദ്ദേഹം കൂട്ടിച്ചേർത്തു. കീഴടങ്ങുന്നതിന് തൊട്ടുമുമ്പ് മാധ്യമങ്ങളോടും സുഹൃത്തുക്കളോടും ഈ വിവരങ്ങൾ വിശദീകരിക്കുന്ന ദൃശ്യങ്ങളും പുറത്തുവന്നിരുന്നു.
സംഭവത്തിൽ ബോംബെ ഷാജി, റാഷി, ബാവ (സാലിഹ്), മമ്മളി (ഹസൻ), നിസാർ എന്നിവരുൾപ്പെടെ ആറ് പ്രതികളാണ് ഉള്ളത്. പുലർച്ചെ ഓഫിസിലെ റൂം ബോയിയുടെ കൈകാലുകൾ ബന്ധിപ്പിച്ച് കീഴ്പെടുത്തിയ ശേഷമാണ് സംഘം സ്ട്രോങ് റൂം തകർത്ത് പണം കവർന്നത്. നാദാപുരം കോടതിയിൽ ഹാജരാക്കിയ ബാലകൃഷ്ണനെ റിമാൻഡ് ചെയ്ത് കൊയിലാണ്ടി സബ് ജയിലിലേക്ക് മാറ്റി. ഒളിവിൽ കഴിയുന്ന മറ്റ് പ്രതികൾക്കായുള്ള അന്വേഷണം കേരള പൊലീസും ഊർജിതമാക്കിയിട്ടുണ്ട്.
