പ്രതിഷേധത്തിൽ പങ്കെടുക്കാൻ ഓസ്ട്രേലിയയിൽ നിന്ന് ഡൽഹിയിലെത്തി യുവാവ്; ടിക്കറ്റിനായി ചെലവഴിച്ചത് ഒരു ലക്ഷം രൂപ! വീഡിയോ
ന്യൂഡൽഹി: നീറ്റ്-യുജി (NEET-UG) പരീക്ഷാ ചോദ്യപേപ്പർ ചോർച്ചയ്ക്കെതിരെ തലസ്ഥാന നഗരിയിൽ നടക്കുന്ന പ്രതിഷേധ പ്രകടനത്തിൽ പങ്കാളിയാകാൻ ഓസ്ട്രേലിയയിൽ നിന്ന് ഡൽഹിയിലേക്ക് വിമാനമിറങ്ങി ഇന്ത്യൻ യുവാവ്. കോക്ക്റോച്ച് ജനതാ പാർട്ടി (CJP) ഡൽഹിയിൽ സംഘടിപ്പിച്ച ‘ചലോ സൻസദ്’ മാർച്ചിന്റെ ഭാഗമാകാൻ ഏകദേശം ഒരു ലക്ഷത്തോളം രൂപ ചെലവഴിച്ചാണ് താൻ ഇങ്ങോട്ടേക്ക് എത്തിയതെന്ന് യുവാവ് അവകാശപ്പെടുന്നു. സോഷ്യൽ മീഡിയയിൽ വൈറലായ ഒരു വീഡിയോയിലൂടെയാണ് ഈ അപൂർവ്വ സംഭവത്തിന്റെ വിവരങ്ങൾ പുറത്തുവന്നത്.
ഓസ്ട്രേലിയയിൽ ജോലി ചെയ്യുന്ന ഇന്ത്യൻ വംശജനായ ഈ യുവാവ്, പ്രമുഖ കണ്ടന്റ് ക്രിയേറ്റർ സാർത്ഥക് ഗോസ്വാമി പങ്കുവെച്ച ഇൻസ്റ്റാഗ്രാം വീഡിയോയിലാണ് തന്റെ നിലപാട് വ്യക്തമാക്കിയത്. താൻ അവിടെ നിന്നുള്ള വിമാന ടിക്കറ്റിനായി മാത്രം ഒരു ലക്ഷം രൂപ ചെലവഴിച്ചാണ് പ്രതിഷേധ വേദിയിലേക്ക് എത്തിയതെന്ന് പറയുന്ന യുവാവ്, ഇതിന് തെളിവായി തന്റെ ഓസ്ട്രേലിയൻ ഐഡന്റിറ്റി കാർഡും കാണിക്കുന്നുണ്ട്. നീറ്റ് പരീക്ഷ എഴുതിയ ആളാണോ അതോ സമാനമായ മറ്റ് മത്സരപരീക്ഷകൾക്ക് തയ്യാറെടുക്കുന്ന ആളാണോ എന്ന ചോദ്യത്തിന്, തനിക്ക് ഈ പരീക്ഷകളുമായി നേരിട്ട് ബന്ധമൊന്നുമില്ലെന്നാണ് യുവാവിന്റെ മറുപടി.
താൻ ബി.ടെക് ബിരുദധാരിയാണെന്നും എന്നാൽ രാജ്യത്ത് നടക്കുന്ന പ്രക്ഷോഭങ്ങൾ ഒരു പരീക്ഷയിൽ മാത്രം ഒതുങ്ങുന്നതല്ലെന്നും യുവാവ് അഭിപ്രായപ്പെടുന്നു. കേന്ദ്ര സർക്കാരിന്റെ നിലപാടുകൾ ജനാധിപത്യ വിരുദ്ധവും ഏകാധിപത്യപരവുമാണെന്ന് ആരോപിച്ച യുവാവ്, സമരം ചെയ്യുന്നവരുമായി ചർച്ചയ്ക്ക് പോലും സർക്കാർ തയ്യാറാകുന്നില്ലെന്ന് കുറ്റപ്പെടുത്തി. 18 ദിവസമായി പ്രമുഖ സാമൂഹിക പ്രവർത്തകൻ സുന്നം വാങ്ചു നിരാഹാര സമരം കിടന്നിട്ടും പ്രശ്നപരിഹാരത്തിന് ശ്രമിക്കാത്ത സർക്കാരിന്റെ നിലപാടാണ് പ്രതിഷേധത്തിന്റെ ഭാഗമാകാൻ തന്നെ പ്രേരിപ്പിച്ചതെന്നും അദ്ദേഹം കൂട്ടിച്ചേർത്തു.
നീറ്റ് ചോർച്ചയുമായി ബന്ധപ്പെട്ട് കേന്ദ്ര വിദ്യാഭ്യാസ മന്ത്രി ധർമ്മേന്ദ്ര പ്രധാൻ രാജി വെക്കണമെന്നും ഉത്തരവാദികൾക്കെതിരെ കർശന നടപടി സ്വീകരിക്കണമെന്നും ആവശ്യപ്പെട്ടാണ് സി.ജെ.പി സമരം ശക്തമാക്കിയത്. വിദേശത്തുനിന്നടക്കം പ്രതിഷേധത്തിന് പിന്തുണയുമായി യുവാക്കൾ എത്തുന്നത് ജനശ്രദ്ധ നേടുന്നുണ്ടെങ്കിലും, ലക്ഷങ്ങൾ ചെലവഴിച്ച് സമരം കാണാൻ എത്തിയ യുവാവിന്റെ വിഡിയോ നിലവിൽ സമൂഹമാധ്യമങ്ങളിൽ വലിയ ചർച്ചകൾക്കാണ് വഴിവെച്ചിരിക്കുന്നത്.
