റോഡല്ല, ഇത് മരണക്കുഴി! ചിയ്യാനൂർ റോഡിൻ്റെ തകർച്ചയിൽ ദുരിതമൊഴിയാതെ നാട്ടുകാർ
ചങ്ങരംകുളം: മലപ്പുറം ജില്ലയിലെ ചങ്ങരംകുളം ടൗണിനോട് ചേർന്നുള്ള ആലങ്കോട് പഞ്ചായത്ത് ഓഫീസിന് മുന്നിലൂടെ കടന്നുപോകുന്ന ചിയ്യാനൂർ റോഡ് പൂർണ്ണമായും തകർന്ന് തരിപ്പണമായിട്ടും അധികൃതർ അനങ്ങുന്നില്ലെന്ന് പരാതി. റോഡിലുടനീളം രൂപപ്പെട്ടിരിക്കുന്ന വൻ കുഴികൾ കാരണം ഇതുവഴിയുള്ള യാത്ര ജീവൻ പണയം വെച്ചാണെന്ന് നാട്ടുകാർ പറയുന്നു.
രോഗികൾ, ഗർഭിണികൾ, പ്രായമായവർ, സ്കൂൾ കുട്ടികൾ അടക്കം നൂറുകണക്കിന് ആളുകൾ ദിവസവും ആശ്രയിക്കുന്ന പ്രധാന വഴിയാണിത്. റോഡിൻ്റെ ദയനീയ അവസ്ഥ കാരണം അടിയന്തര ഘട്ടങ്ങളിൽ പോലും ഓട്ടോറിക്ഷകൾ ഈ റൂട്ടിലേക്ക് വരാൻ മടിക്കുന്ന അവസ്ഥയാണ്. ഇരുചക്ര വാഹനയാത്രക്കാർ കുഴികളിൽ വീണ് അപകടത്തിൽപ്പെടുന്നത് ഇവിടെ നിത്യസംഭവമായി മാറിയിരിക്കുന്നു.
“ഇതൊരു റോഡാണോ അതോ കുളമാണോ എന്ന് തിരിച്ചറിയാൻ പറ്റാത്ത അവസ്ഥയാണ്. ഒരു ഓട്ടോ വിളിച്ചാൽ പോലും ഇങ്ങോട്ട് വരാൻ തയാറാകുന്നില്ല. രോഗികളെയും കൊണ്ട് എങ്ങനെയാണ് ഞങ്ങൾ ഇതുവഴി പോവുക?” – നാട്ടുകാർ ചോദിക്കുന്നു.
ദുരിതം അതിരുകടന്നതോടെ നാട്ടുകാർ ഒപ്പിട്ട് ബഹുമാനപ്പെട്ട കേരള മുഖ്യമന്ത്രിക്ക് നേരിട്ട് പരാതി നൽകിയിട്ടും യാതൊരുവിധ നടപടിയും ഉണ്ടായിട്ടില്ലെന്നാണ് പ്രദേശവാസികൾ കുറ്റപ്പെടുത്തുന്നത്. ജനങ്ങളുടെ ദുരിതത്തിന് നേരെ കണ്ണടയ്ക്കുന്ന അധികൃതരുടെ ഈ കടുത്ത അവഗണനയ്ക്കെതിരെ ശക്തമായ ജനകീയ പ്രതിഷേധത്തിന് ഒരുങ്ങുകയാണ് നാട്ടുകാർ. തകർന്നുകിടക്കുന്ന ചിയ്യാനൂർ റോഡ് യുദ്ധകാലാടിസ്ഥാനത്തിൽ പുനർനിർമിച്ച് ജനങ്ങളുടെ യാത്രാദുരിതത്തിന് അടിയന്തര പരിഹാരം കാണണമെന്നാണ് പ്രദേശവാസികളുടെ പ്രധാന ആവശ്യം.
