വാട്സ്ആപ്പിൽ വൻ സ്വകാര്യത മാറ്റം: ഇനി ഫോൺ നമ്പർ ഇല്ലാതെ ബന്ധപ്പെടാം
മെറ്റയുടെ ഉടമസ്ഥതയിലുള്ള പ്രമുഖ മെസേജിംഗ് പ്ലാറ്റ്ഫോമായ വാട്സ്ആപ്പ്, ഉപയോക്താക്കളുടെ സ്വകാര്യത ശക്തിപ്പെടുത്തുന്നതിനായി പുതിയ “യൂസർനെയിം” ഫീച്ചർ അവതരിപ്പിച്ചു. ഇതിലൂടെ ഇനി മുതൽ ഫോൺ നമ്പർ പങ്കുവയ്ക്കാതെ തന്നെ മറ്റുള്ളവരുമായി വാട്സ്ആപ്പിൽ ബന്ധപ്പെടാൻ സാധിക്കും. നിലവിൽ ലോകമെമ്പാടും ഘട്ടംഘട്ടമായി ഈ ഫീച്ചർ ലഭ്യമാക്കുന്ന പ്രക്രിയ ആരംഭിച്ചിട്ടുണ്ട്. പൂർണ്ണമായ സേവനം ഈ വർഷം അവസാനത്തോടെ പുറത്തിറങ്ങുമെന്നാണ് റിപ്പോർട്ട്.
പുതിയ സംവിധാനത്തിൽ ഓരോ ഉപയോക്താവിനും ഒരു യുണീക് യൂസർനെയിം തെരഞ്ഞെടുക്കാൻ കഴിയും. ഈ യൂസർനെയിം ഉപയോഗിച്ച് മറ്റുള്ളവർക്ക് നിങ്ങളുടെ അക്കൗണ്ട് കണ്ടെത്താനോ സന്ദേശം അയയ്ക്കാനോ സാധിക്കും. എന്നാൽ പ്രധാനമായി ശ്രദ്ധിക്കേണ്ടത്, വാട്സ്ആപ്പിൽ നേരിട്ട് തിരയൽ സംവിധാനം (search directory) ഇല്ലാത്തതിനാൽ, കൃത്യമായ യൂസർനെയിം അറിയുന്നവർക്ക് മാത്രമേ ബന്ധപ്പെടാൻ കഴിയൂ എന്നതാണ്.
കൂടുതൽ സുരക്ഷയ്ക്കായി “username key” എന്ന അധിക സുരക്ഷാ പാളിയും വാട്സ്ആപ്പ് അവതരിപ്പിക്കുന്നു. ഇത് ഒരു പാസ്കോഡ് പോലെയാണ് പ്രവർത്തിക്കുന്നത്. യൂസർനെയിം അറിയുന്നവർക്കും ഈ കീ ഇല്ലെങ്കിൽ സന്ദേശം അയയ്ക്കാൻ കഴിയില്ല. ഇതിലൂടെ അനാവശ്യ സന്ദേശങ്ങളും സ്പാം പ്രശ്നങ്ങളും കുറയ്ക്കാനാണ് ലക്ഷ്യം.
ബിസിനസ്സുകൾക്കും പൊതുപ്രവർത്തകർക്കും അവരുടെ ഇൻസ്റ്റാഗ്രാം അല്ലെങ്കിൽ ഫേസ്ബുക്ക് യൂസർനെയിം തന്നെ വാട്സ്ആപ്പിലും ഉപയോഗിക്കാനുള്ള സൗകര്യം ഒരുക്കിയിട്ടുണ്ട്. 3 മുതൽ 35 അക്ഷരങ്ങൾ വരെ ഉള്ള യൂസർനെയിം തിരഞ്ഞെടുക്കാൻ കഴിയുന്ന ഈ സംവിധാനം, വാട്സ്ആപ്പിന്റെ പരമ്പരാഗത ഫോൺ നമ്പർ അടിസ്ഥാനത്തിലുള്ള ആശയവിനിമയ രീതിയിൽ വലിയ മാറ്റമായി വിലയിരുത്തപ്പെടുന്നു.
സമൂഹമാധ്യമ ആശയവിനിമയത്തിൽ സ്വകാര്യതയും നിയന്ത്രണവും കൂടുതൽ ശക്തമാക്കുന്ന നിർണായക മാറ്റമായാണ് ഈ പുതിയ അപ്ഡേറ്റ് കാണപ്പെടുന്നത്.
