‘വൃദ്ധസദനം’ ഇനി പഴങ്കഥ; തണലേകാൻ സ്നേഹത്തിന്റെ വിലാസങ്ങൾ; ‘സ്നേഹാലയം’ എന്ന് പുനർനാമകരണം ചെയ്ത് സർക്കാർ
തിരുവനന്തപുരം: സംസ്ഥാനത്തെ സർക്കാർ നിയന്ത്രണത്തിലുള്ള വൃദ്ധസദനങ്ങളുടെ പേര് മാറ്റാൻ നിർണ്ണായക തീരുമാനവുമായി സാമൂഹ്യനീതി വകുപ്പ്. ഇനി മുതൽ സർക്കാർ വൃദ്ധസദനങ്ങൾ ‘സ്നേഹാലയം‘ എന്ന പുതിയ പേരിൽ അറിയപ്പെടും. വാർദ്ധക്യകാലത്ത് ഒറ്റപ്പെട്ടുപോകുന്നവർക്ക് ആശ്വാസവും സുരക്ഷിതത്വവും നൽകുന്ന കേന്ദ്രങ്ങൾക്ക് കൂടുതൽ മാനുഷിക മൂല്യവും ഊഷ്മളമായ കുടുംബ അന്തരീക്ഷവും നൽകുക എന്ന ലക്ഷ്യത്തോടെയാണ് ഈ മാറ്റം.
’വൃദ്ധസദനം’ എന്ന പ്രയോഗം അന്തേവാസികളിലും പൊതുസമൂഹത്തിലും ഉണ്ടാക്കുന്ന മാനസികമായ അകൽച്ചയും ഒറ്റപ്പെടൽ ബോധവും ഒഴിവാക്കാനാണ് സർക്കാർ ഈ ഘടനാപരമായ മാറ്റത്തിന് മുതിർന്നത്. വയസ്സുകാലത്ത് ഒറ്റപ്പെട്ടുപോയവരല്ല, മറിച്ച് സ്നേഹവും കരുതലും തണലും അനുഭവിക്കുന്ന ഒരിടത്താണ് തങ്ങൾ കഴിയുന്നതെന്ന ബോധ്യം അന്തേവാസികളിൽ വളർത്താൻ പേരുമാറ്റം സഹായിക്കുമെന്ന് സാമൂഹ്യനീതി വകുപ്പ് വ്യക്തമാക്കുന്നു.
ഔദ്യോഗിക രേഖകളിലും മാറ്റണം; മനുഷ്യാവകാശ കമ്മീഷന്റെ ശക്തമായ ഇടപെടൽ
വൃദ്ധസദനങ്ങളുടെ പേര് ‘സ്നേഹാലയം’ എന്ന് മാറ്റിക്കൊണ്ടുള്ള സർക്കാർ ഉത്തരവ് പ്രകാരം ബന്ധപ്പെട്ട സ്ഥാപനങ്ങളുടെ എല്ലാ ഔദ്യോഗിക രേഖകളിലും പുതിയ പേര് അടിയന്തരമായി രേഖപ്പെടുത്തണമെന്ന് സംസ്ഥാന മനുഷ്യാവകാശ കമ്മീഷൻ നിർദ്ദേശിച്ചു. ഇതിനുപുറമെ, ‘വൃദ്ധസദനം’ എന്ന പേര് പൊതുപ്രയോഗത്തിൽ നിന്നും പൂർണ്ണമായി ഒഴിവാക്കുന്നതിനായി സമൂഹത്തിൽ ആവശ്യമായ ബോധവൽക്കരണം നൽകാനും കമ്മീഷൻ ഉത്തരവിട്ടു.
നെയിം ബോർഡുകൾ, ഔദ്യോഗിക വെബ്സൈറ്റുകൾ, പ്രസിദ്ധീകരണങ്ങൾ, പൊതുജനങ്ങൾ ഉപയോഗിക്കുന്ന മറ്റ് രേഖകൾ എന്നിവയിലെല്ലാം പേരുമാറ്റം ഉറപ്പാക്കാൻ അടിയന്തര ഭരണപരമായ നടപടികൾ സ്വീകരിക്കാൻ സാമൂഹികനീതി വകുപ്പ് ഡയറക്ടർക്ക് കമ്മീഷൻ കർശന നിർദ്ദേശം നൽകിയിട്ടുണ്ട്.
‘വൃദ്ധർ’ എന്ന പദം മുതിർന്ന പൗരന്മാരിൽ വലിയ അപകർഷതാബോധം ഉണ്ടാക്കുന്നുവെന്നും വർദ്ധിച്ചുവരുന്ന വയോജന ജനസംഖ്യ പരിഗണിച്ച് ഇത്തരം സ്ഥാപനങ്ങളുടെ പേര് മാറ്റണമെന്നും ആവശ്യപ്പെട്ട് പ്രൊഫ. വർഗീസ് മാത്യു സമർപ്പിച്ച പരാതിയിലാണ് കമ്മീഷന്റെ ഈ നടപടി. 2024 ഡിസംബർ 2-ലെ സർക്കാർ ഉത്തരവ് (നമ്പർ: 247/2024/SJD) പ്രകാരം വൃദ്ധസദനങ്ങളുടെ പേര് ‘സ്നേഹാലയം’ എന്ന് മാറ്റിയതായി സാമൂഹ്യനീതി വകുപ്പ് ഡയറക്ടർ കമ്മീഷനെ നേരത്തെ അറിയിച്ചിരുന്നെങ്കിലും, ഇപ്പോഴും പലയിടത്തും പഴയ പേര് തന്നെയാണ് വ്യാപകമായി ഉപയോഗിക്കുന്നത് എന്ന് കണ്ടെത്തിയതിനെ തുടർന്നാണ് കമ്മീഷൻ വീണ്ടും വിഷയത്തിൽ ഇടപെട്ടത്.
ജീവിതസന്ധ്യയിൽ തണൽ തേടുന്നവർക്ക് അനാഥത്വത്തിന്റെ കുറ്റബോധമല്ല, മറിച്ച് സ്നേഹം ചൊരിയുന്ന ഒരു വീടാണ് ആവശ്യമെന്ന തിരിച്ചറിവിനെ അതിയായ സന്തോഷത്തോടെയാണ് കേരള സമൂഹം നെഞ്ചിലേറ്റുന്നത്.
