ലോകകപ്പ് സമ്മാനത്തുകയിലും കയ്യിട്ടുവാരാന് ട്രംപ്; സ്പെയിന് നികുതി നല്കണം!
ന്യൂയോർക്ക്/വാഷിംഗ്ടൺ: 2026 ഫിഫ ലോകകപ്പ് ഫൈനലിൽ അർജന്റീനയെ വീഴ്ത്തി വിശ്വവിജയികളായ സ്പെയിൻ ദേശീയ ഫുട്ബോൾ ടീമിന് ലഭിച്ച ഭീമമായ സമ്മാനത്തുകയിൽ വൻ തുക അമേരിക്കൻ നികുതി ഏജൻസിക്ക് നൽകേണ്ടിവരുമെന്ന് റിപ്പോർട്ട്. ലോകകപ്പ് കിരീടം നേടിയ സ്പെയിന് അന്താരാഷ്ട്ര ഫുട്ബോൾ ഫെഡറേഷൻ (ഫിഫ) നൽകുന്ന 50 ദശലക്ഷം യു.എസ് ഡോളറിന്റെ (ഏകദേശം 415 കോടിയിലേറെ ഇന്ത്യൻ രൂപ) സമ്മാനത്തുകയിലാണ് യു.എസ് ആഭ്യന്തര നികുതി ഏജൻസിയായ ഐ.ആർ.എസ് (Internal Revenue Service) കണ്ണുവെച്ചിരിക്കുന്നത്. അമേരിക്കൻ മണ്ണിൽ വെച്ച് നടക്കുന്ന അല്ലെങ്കിൽ ഉണ്ടാക്കുന്ന ഏത് വരുമാനത്തിനും ഫെഡറൽ നികുതി നിയമങ്ങൾ ബാധകമാണെന്ന നയത്തിന്റെ അടിസ്ഥാനത്തിലാണ് ഐ.ആർ.എസ് നീക്കം.
യു.എസ്, കാനഡ, മെക്സിക്കോ എന്നീ രാജ്യങ്ങൾ സംയുക്തമായി ആതിഥേയത്വം വഹിച്ച ഇത്തവണത്തെ ലോകകപ്പിൽ, ഫിഫയ്ക്ക് തങ്ങളുടെ നിയമപരമായ പദവി (Section 501(c)) ഉപയോഗിച്ച് ദേശീയ ഫുട്ബോൾ ഫെഡറേഷനുകളുടെ തലത്തിൽ ചില നികുതി ഇളവുകൾ നേടാൻ സാധിച്ചിരുന്നു. എന്നാൽ ഇളവുകൾ കളിക്കാർക്കും പരിശീലകർക്കും സപ്പോർട്ട് സ്റ്റാഫുകൾക്കും ബാധകമല്ലെന്ന് സാമ്പത്തിക വിദഗ്ദ്ധർ വ്യക്തമാക്കുന്നു. വിദേശ കായികതാരങ്ങൾ യു.എസ് മണ്ണിൽ നിന്ന് നേടുന്ന വരുമാനത്തിന് 30 ശതമാനം വരെ ഫെഡറൽ വിത്ഹോൾഡിംഗ് നികുതി (Federal Withholding Tax) അടക്കാൻ നിയമപരമായി ബാധ്യസ്ഥരാണ്.
ഇതിനുപുറമേ, മത്സരങ്ങൾ നടന്ന വിവിധ അമേരിക്കൻ സംസ്ഥാനങ്ങളിലെ പ്രാദേശിക വരുമാന നികുതിയും അഥവാ ‘ജോക്ക് ടാക്സും’ (Jock Tax) കളിക്കാർക്ക് തിരിച്ചടിയാകും. ഫൈനൽ മത്സരം നടന്ന ന്യൂജേഴ്സിയിൽ 10.75 ശതമാനവും ഗ്രൂപ്പ് മത്സരങ്ങൾ നടന്ന കാലിഫോർണിയയിൽ 13.3 ശതമാനവുമാണ് പ്രാദേശിക നികുതി നിരക്കുകൾ. അന്താരാഷ്ട്ര നികുതി കരാറുകളെ പല യു.എസ് സംസ്ഥാനങ്ങളും അംഗീകരിക്കാത്തതിനാൽ, വിദേശ കളിക്കാർക്കും അധികൃതർക്കും തങ്ങളുടെ ആകെ വരുമാനത്തിന്റെ 30 മുതൽ 40 ശതമാനം വരെ നികുതിയിനത്തിൽ മാത്രം അമേരിക്കയിൽ നൽകേണ്ടിവരും.
കായിക മാമാങ്കങ്ങൾക്ക് ആതിഥേയത്വം വഹിച്ച മുൻ രാജ്യങ്ങളായ ഖത്തർ, റഷ്യ, ബ്രസീൽ തുടങ്ങിയവയെല്ലാം കളിക്കാർക്കും പങ്കാളികൾക്കും പൂർണ്ണ നികുതി ഇളവുകൾ അനുവദിച്ചിരുന്ന സ്ഥാനത്താണ് അമേരിക്കയുടെ ഈ കർശന നിലപാട്. ഈ നടപടിയെ അമേരിക്കൻ ജനപ്രതിനിധി സഭയിലെ റിപ്പബ്ലിക്കൻ പാർട്ടി അംഗമായ ടിം ബർചെറ്റ് ഉൾപ്പെടെയുള്ള പ്രമുഖ രാഷ്ട്രീയ നേതാക്കൾ രൂക്ഷമായി വിമർശിച്ചിട്ടുണ്ട്. ലോകമെമ്പാടുമുള്ള കായികതാരങ്ങളെയും വിനോദസഞ്ചാരികളെയും സ്വാഗതം ചെയ്ത ശേഷം അവരുടെ സമ്മാനത്തുക തട്ടിയെടുക്കുന്നത് തെറ്റായ സന്ദേശമാണ് നൽകുന്നതെന്നും, അമേരിക്കൻ നികുതി വ്യവസ്ഥ പരിഷ്കരിക്കേണ്ടതുണ്ടെന്നും അദ്ദേഹം അഭിപ്രായപ്പെട്ടു. എന്നാൽ, കളിക്കാർ സ്വന്തം രാജ്യങ്ങളിലേക്ക് മടങ്ങുമ്പോൾ ഇരട്ട നികുതി ഒഴിവാക്കൽ കരാറുകൾ (Double Taxation Treaties) വഴി എത്രത്തോളം ആശ്വാസം ലഭിക്കുമെന്നാണ് സ്പാനിഷ് ഫുട്ബോൾ അസോസിയേഷൻ പരിശോധിച്ച് വരുന്നത്.
