‘സോറി പപ്പാ, ഞാൻ പരമാവധി ശ്രമിച്ചു’; 50 തവണ സർക്കാർ ജോലിക്ക് ശ്രമിച്ചിട്ടും പരാജയപ്പെട്ട ബി.ടെക് സ്വർണ്ണമെഡൽ ജേതാവ് ജീവനൊടുക്കി
കാൻപൂർ: കരിയറിൽ മികച്ച വിജയം കൊയ്തിട്ടും സർക്കാർ ജോലി കണ്ടെത്താനാകാത്തതിലുള്ള കടുത്ത മാനസിക വിഷമത്തെ തുടർന്ന് 23-കാരനായ ബി.ടെക് സ്വർണ്ണമെഡൽ ജേതാവ് ജീവനൊടുക്കി. ഉത്തർപ്രദേശിലെ കാൻപൂരിലെ ഗോവിന്ദ് നഗർ പോലീസ് സ്റ്റേഷൻ പരിധിയിലാണ് രാജ്യത്തെ ഞെട്ടിച്ച ഈ ദാരുണ സംഭവം അരങ്ങേറിയത്. ബി.ടെക് ഇലക്ട്രിക്കൽ എഞ്ചിനീയറിംഗിൽ സംസ്ഥാന തലത്തിൽ മൂന്നാം റാങ്ക് നേടുകയും ഗവർണറിൽ നിന്ന് സ്വർണ്ണമെഡൽ ഏറ്റുവാങ്ങുകയും ചെയ്ത ആനന്ദ് കുമാർ എന്ന യുവാവാണ് മരണപ്പെട്ടത്.
പഠനത്തിൽ അതീവ മിടുക്കനായിരുന്ന ആനന്ദ്, ബിരുദം പൂർത്തിയാക്കിയ ശേഷം റെയിൽവേ, ബാങ്ക്, എസ്.എസ്.സി തുടങ്ങിയ വിവിധ മേഖലകളിലായി അമ്പതോളം സർക്കാർ ജോലി പരീക്ഷകൾ എഴുതിയിരുന്നതായി പോലീസ് വ്യക്തമാക്കി. എന്നാൽ ഇതിലൊന്നിലും വിജയിക്കാൻ സാധിക്കാതെ വന്നതോടെ താരം കടുത്ത വിഷാദത്തിലാവുകയായിരുന്നു. മുറിയിൽ നിന്ന് പോലീസ് കണ്ടെടുത്ത അഞ്ചുവരി മാത്രം നീളമുള്ള ആത്മഹത്യാക്കുറിപ്പിൽ, “സോറി പപ്പാ, ഞാൻ 50 തവണ സർക്കാർ ജോലിക്കായി ശ്രമിച്ചു, പക്ഷേ വിജയിക്കാനായില്ല. എന്നോട് ക്ഷമിക്കണം” എന്ന് ആനന്ദ് എഴുതിയിരുന്നു. കത്തിൽ എട്ടോളം തവണ യുവാവ് പപ്പയോട് മാപ്പ് ചോദിച്ചിട്ടുണ്ടെന്നും പോലീസ് അറിയിച്ചു.
ആനന്ദിന്റെ സഹോദരന്റെ വിവാഹ ആവശ്യങ്ങൾക്കായി അച്ഛനും മുത്തശ്ശനും ബിഹാറിലേക്ക് പോയ സമയത്തായിരുന്നു സംഭവം. വീട്ടിലെത്തിയ ജോലിക്കാരി വാതിൽ അകത്തുനിന്ന് പൂട്ടിയ നിലയിൽ കണ്ടെത്തുകയും, സംശയം തോന്നി പോലീസിൽ വിവരമറിയിക്കുകയുമായിരുന്നു. പോലീസ് എത്തി വാതിൽ പൊളിച്ചു നോക്കിയപ്പോഴാണ് ആനന്ദിനെ ഫാനിൽ തൂങ്ങിമരിച്ച നിലയിൽ കണ്ടെത്തിയത്. സ്വകാര്യ മേഖലയിൽ ജോലി ചെയ്തിരുന്നെങ്കിലും ഒരു സർക്കാർ ജോലി സ്വന്തമാക്കുക എന്നത് യുവാവിന്റെ വലിയ സ്വപ്നമായിരുന്നു. കഠിനമായി ശ്രമിച്ചിട്ടും ലക്ഷ്യം കാണാനാകാത്ത യുവതലമുറ നേരിടുന്ന കടുത്ത മാനസിക സമ്മർദ്ദത്തിന്റെ നേർച്ചിത്രമായി മാറിയിരിക്കുകയാണ് ഈ സംഭവം.
ആത്മഹത്യ ഒന്നിനും പരിഹാരമല്ല
