പെനാൽറ്റി പിഴവിന് മധുരപ്രതികാരം; ഓസ്ട്രിയക്കെതിരെ അർജന്റീനയ്ക്ക് ലീഡ്, ലോകകപ്പ് ചരിത്രത്തിൽ എക്കാലത്തെയും റെക്കോർഡ് ഗോൾ നേട്ടവുമായി മെസ്സി
2026 ഫിഫ ലോകകപ്പിലെ ഗ്രൂപ്പ് ജെ നിർണായക പോരാട്ടത്തിൽ ഓസ്ട്രിയക്കെതിരെ അർജന്റീനയ്ക്ക് ആദ്യ പകുതിയിൽ ഏകപക്ഷീയമായ ഒരു ഗോളിന്റെ ലീഡ്. ടെക്സസിലെ ഡാളസ് സ്റ്റേഡിയത്തിൽ നടക്കുന്ന ആവേശകരമായ മത്സരത്തിന്റെ 37-ാം മിനിറ്റിൽ നായകൻ ലയണൽ മെസ്സിയാണ് നിലവിലെ ചാമ്പ്യന്മാരായ അർജന്റീനയെ മുന്നിലെത്തിച്ചത്. ഈ ഗോളോടെ ലോകകപ്പ് ചരിത്രത്തിൽ ഏറ്റവും കൂടുതൽ ഗോളുകൾ നേടുന്ന താരം എന്ന ഇതിഹാസ റെക്കോർഡ് ലയണൽ മെസ്സിക്ക് മാത്രമായി സ്വന്തമായി. ജർമ്മനിയുടെ മുൻ താരം മിറോസ്ലാവ് ക്ലോസെയുടെ 16 ഗോളുകളുടെ റെക്കോർഡാണ് 17-ാം ഗോളോടെ മെസ്സി മറികടന്നത്.
മത്സരത്തിന്റെ എട്ടാം മിനിറ്റിൽ തന്നെ അർജന്റീനയ്ക്ക് അനുകൂലമായി പെനാൽറ്റി ലഭിച്ചിരുന്നു. എന്നാൽ കിക്കെടുത്ത മെസ്സിയുടെ ഷോട്ട് ലക്ഷ്യം കാണാതെ പുറത്തുപോയത് ആരാധകരെ നിരാശരാക്കി. എന്നാൽ കളിയിലുടനീളം പന്തടക്കത്തിലും ആക്രമണത്തിലും മികച്ചുനിന്ന അർജന്റീന ഒടുവിൽ മെസ്സിയുടെ മാന്ത്രിക നീക്കത്തിലൂടെ തന്നെ ലീഡ് സ്വന്തമാക്കുകയായിരുന്നു. പെനാൽറ്റി ബോക്സിന്റെ അരികിൽ നിന്ന് കൃത്യമായൊരു ഷോട്ടിലൂടെയാണ് മെസ്സി ഓസ്ട്രിയൻ വല കുലുക്കിയത്. ആദ്യ മത്സരത്തിൽ അൾജീരിയയെ പരാജയപ്പെടുത്തിയ അർജന്റീന ഈ മത്സരത്തിലും വിജയം തുടർന്നാൽ റൗണ്ട് ഓഫ് 32 യോഗ്യത ഉറപ്പാക്കാനാകും.
