നരേന്ദ്ര മോദി പങ്കെടുക്കുന്ന മുംബൈയിലെ പരിപാടിക്ക് തൊട്ടുമുമ്പ് വൻ സുരക്ഷാ വീഴ്ച; തോക്കും വ്യാജ തിരിച്ചറിയല് കാർഡും കണ്ടെത്തി
മുംബൈ: പ്രധാനമന്ത്രി നരേന്ദ്ര മോദി പങ്കെടുത്ത ഉന്നതതല ചടങ്ങിന് മുന്നോടിയായി മുംബൈയിൽ വൻ സുരക്ഷാ ആശങ്ക സൃഷ്ടിച്ച് രണ്ട് പേർ പോലീസിന്റെ പിടിയിലായി. പ്രധാനമന്ത്രിയുടെ ഓഫീസിലെ (PMO) ഉദ്യോഗസ്ഥനാണെന്ന് അവകാശപ്പെട്ട് വ്യാജ തിരിച്ചറിയൽ കാർഡുമായി എത്തിയ യുവാവിനെയും തോക്ക് കൈവശമുണ്ടായിരുന്ന ഇയാളുടെ ബോഡിഗാർഡിനെയുമാണ് മുംബൈ പോലീസ് അറസ്റ്റ് ചെയ്തത്. ബാന്ദ്ര കുർള കോംപ്ലക്സിലെ (BKC) നിത മുകേഷ് അംബാനി കൾച്ചറൽ സെന്ററിന് (NMACC) സമീപത്തുവെച്ചാണ് സംഭവം. വൻസുരക്ഷാ സന്നാഹങ്ങൾക്കിടയിൽ നടന്ന ഈ സംഭവം പോലീസിനെയും രഹസ്യാന്വേഷണ വിഭാഗത്തെയും വലിയ രീതിയിൽ ആശങ്കയിലാഴ്ത്തിയിട്ടുണ്ട്.
ഡ്രോൺ സാങ്കേതികവിദ്യ ബിസിനസ്സ് നടത്തുന്ന 24-കാരനായ രോഹൻ പരേഖ്, ഇയാളുടെ സുരക്ഷാ ജീവനക്കാരനായ ദിലീപ് കുണ്ഡെ എന്നിവരാണ് കേസിൽ പിടിയിലായത്. ആഗോള ഫിൻടെക് ഫെസ്റ്റ് (Global Fintech Fest 2026) ഉദ്ഘാടനം ചെയ്യുന്നതിനായി പ്രധാനമന്ത്രി എത്തുന്നതിന് തൊട്ടുമുമ്പ് നടന്ന സുരക്ഷാ പരിശോധനകൾക്കിടയിലാണ് ഇരുവരും സംശയാസ്പദമായ രീതിയിൽ സുരക്ഷാ ഉദ്യോഗസ്ഥരുടെ കണ്ണിൽപ്പെടുന്നത്. പരിശോധനയിൽ രോഹൻ കാണിച്ച PMO ഐഡന്റിറ്റി കാർഡ് വ്യാജമാണെന്ന് തെളിയുകയും കൂടെയുണ്ടായിരുന്ന ബോഡിഗാർഡിന്റെ പക്കൽ നിന്ന് തോക്ക് കണ്ടെത്തുകയുമായിരുന്നു.
ഉടൻ തന്നെ മുംബൈ പോലീസും ക്രൈം ബ്രാഞ്ചും ചേർന്ന് ഇവരെ കസ്റ്റഡിയിലെടുത്ത് ചോദ്യം ചെയ്തു. സർക്കാർ ഉദ്യോഗസ്ഥ ചമയൽ, വ്യാജ രേഖ ചമയ്ക്കൽ, നിരോധിത മേഖലയിൽ ആയുധവുമായി പ്രവേശിക്കാൻ ശ്രമിക്കൽ തുടങ്ങി ഭാരതീയ ന്യായ സംഹിതയിലെ (BNS) വിവിധ വകുപ്പുകൾ പ്രകാരം ഇവർക്കെതിരെ കേസെടുത്തിട്ടുണ്ട്. തുടർന്ന് കോടതിയിൽ ഹാജരാക്കിയ പ്രതികളെ സെപ്റ്റംബർ 11 വരെ പോലീസ് കസ്റ്റഡിയിൽ വിട്ടു. സംഭവത്തിൽ കൂടുതൽ വ്യക്തികൾക്ക് പങ്കുണ്ടോ എന്ന് പോലീസ് അന്വേഷിച്ചു വരികയാണ്.
എന്നാൽ പ്രധാനമന്ത്രി പങ്കെടുക്കുന്ന അതിസുരക്ഷാ മേഖലയിൽ വ്യാജ രേഖകളുമായി എത്തിയതിന്റെ യഥാർത്ഥ ലക്ഷ്യം എന്താണെന്ന് വ്യക്തമാക്കാൻ മുംബൈ ക്രൈം ബ്രാഞ്ച് വിശദമായ അന്വേഷണം ആരംഭിച്ചിട്ടുണ്ട്.
ബാന്ദ്ര കുർള കോംപ്ലക്സിലെ പ്രധാന വേദിക്ക് സമീപത്തുനിന്നും വ്യാജ രേഖകളും ആയുധവും കണ്ടെടുത്തതോടെ വിവിഐപി സുരക്ഷ കൂടുതൽ ശക്തമാക്കിയിട്ടുണ്ട്. പ്രധാനമന്ത്രിയുടെ സുരക്ഷാ വിഭാഗമായ എസ്.പി.ജി (SPG) ഉൾപ്പെടെയുള്ള ഏജൻസികൾ നിലവിലെ സുരക്ഷാ ക്രമീകരണങ്ങൾ വിലയിരുത്തുകയും അന്വേഷണ പുരോഗതി നിരീക്ഷിച്ചുവരികയുമാണ്.
